کندهار کې ۸۰ بېوزلو او راستانه شویو کورنیو ته د وزو د وېش لړۍ پیل شوه

۱۸ وږی ۱۴۰۵ هـ.ش
۲۶ رَبِیعُ الْأَوَّل ۱۴۴۸ هـ.ق
د کندهار ښار د شپږمې ناحیې او ژړۍ او ارغستان ولسوالیو کې ۸۰ بېوزلو، اړمنو او تازه راستانه شویو کډوالو کورنیو ته د ۴۳ زره امریکايي ډالرو په ارزښت د وزو د وېش لړۍ پیل شوې ده.
یاده مرسته د کندهار د کرنې، اوبولګولو او مالدارۍ ریاست تر رهبرۍ لاندې، د اروپایي ټولنې په مالي ملاتړ او د افغانستان لپاره د هالنډ کمېټې په تخنیکي همکارۍ ترسره کېږي، چې موخه یې د بېوزلو کورنیو د اقتصادي پیاوړتیا او د هغوی لپاره د دوامدار معیشت زمینه برابرول دي.
د کندهار د کرنې، اوبولګولو او مالدارۍ ریاست د مالدارۍ آمریت ډاکټر نورشاه حقمل وایي، په دې پروګرام کې ټولټال ۱۶۰ وزې او ۳۲۰ یې بچي شامل دي، چې د کندهار ښار په شپږمه ناحیه، ژړۍ او ارغستان ولسوالیو کې به پر ټاکل شویو مستحقو کورنیو ووېشل شي.
د نوموړي په وینا، هرې مستحقې کورنۍ ته به دوه وزې او څلور بچي ورکړل شي. تر دې دمه د کندهار ښار په شپږمه ناحیه او ژړۍ ولسوالۍ کې د وزو د وېش بهیر ترسره شوی او ټاکل شوې چې د ارغستان ولسوالۍ کې هم په نږدې ورځو کې دغه لړۍ بشپړه شي.
د افغانستان لپاره د هالنډ کمېټې مسؤلین وایي، د وزو د وېش موخه د بېوزلو کورنیو اقتصادي وضعیت ښه کول، د هغوی د عاید سرچینې پیاوړې کول، د معیشت زمینه برابرول او په راتلونکي کې د دغو کورنیو د ځان بسیاینې لپاره د زمینې برابرول دي.
د یادونې وړ ده، چې د دغو مرستو د عادلانه او شفاف وېش په موخه یوه میاشت وړاندې د مستحقو کورنیو د نوم‌لیکنې لړۍ ترسره شوې وه. د پروګرام له مخې، هرې ټاکل شوې کورنۍ ته به د وزو ترڅنګ ۱۵۰ کیلوګرامه متراکم خوراک هم ورکړل شي، څو د مالدارۍ د ساتنې او پراختیا لپاره ورته لازم ملاتړ برابر شي.