ننګرهار کې څه باندې ۲۱ زره بزګرانو ته د غنمو اصلاح شوي تخمونه او کیمیاوي سرې وېشل کېږي

۸ وږی ۱۴۰۵ هـ.ش
۱۶ رَبِیعُ الْأَوَّل ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په هڅو، د ملګرو ملتونو د کرنې او خوړو ادارې «افاې‌او» په مالي ملاتړ او د نوي مشورتي او مرستندویه مؤسسې په تخنیکي همکارۍ، د ننګرهار په ولایت کې د جلال‌اباد ښار په ګډون په ۱۷ ولسوالیو کې ۲۱ زره او ۳۷۰ بزګرانو ته د غنمو اصلاح شوي تخمونه او کیمیاوي سرې وېشل کېږي.
یاده مرسته په چپرهار، شینوارو، کامې، کوټ، مهمندرې، لعلپورې، دوربابا، بټي‌کوټ، حصارک، شیرزاد، خوګیاڼو، پچیراګام، کوز کونړ، ګوشتې، سره‌ رود او بهسود ولسوالیو کې ترسره کېږي.
د ننګرهار د کرنې، اوبو لګولو او مالدارۍ رییس مولوي عبدالستار محمد وایي، په ولسوالیو کې د مستحقو بزګرانو د انتخاب بهیر روان دی او ټاکل شویو بزګرانو ته به د غنمو د کرلو له موسم څخه شاوخوا یوه میاشت وړاندې اصلاح شوي تخمونه او کیمیاوي سرې ورکړل شي.
نوموړي زیاته کړه، له دې ډلې ۱۲ زره او ۳۷۰ تنه ناچاره، تازه راستنو شوو هېوادوالو، کورني بې‌ځایه شوي او بزګران به په وړیا ډول او ۹ زره نور بزګران به په نیمه بیه له اصلاح شوو تخمونو څخه برخمن شي. د وړیا مرستو په هره کڅوړه کې ۵۰ کیلوګرامه د غنمو اصلاح شوي تخم۵۰ کیلوګرامه یوریا سره او ٥٠ کیلوګرامه توره سره شامله ده.
د نوي مشورتي او مرستندویه مؤسسې ولایتي مسؤل، انجینر روح‌الله درویش، وایي چې د دغو مرستو د وېش موخه د کرنې له لارې د بزګرانو او تازه راستنو شوو هېوادوالو ملاتړ، د کرنیزو تولیداتو زیاتوالی او د خوړو خوندیتوب پیاوړی کول دي.
 نوموړي وویل، چې د اصلاح شوو تخمونو او کیمیاوي سرو وېش؛ د بزګرانو ملاتړ، د حاصلاتو زیاتوالی او د خوړو د خوندیتوب پر لور یو مهم ګام دی.