لغمان کې د کرنې او مالدارۍ د پراختیا په موخه سکتوري غونډه ترسره شوه

۲۲ چنګاښ ۱۴۰۵ هـ.ش
۲۷ مُحَرَّمُ الحَرام ۱۴۴۸ه‍.ق
د لغمان د کرنې، اوبولګولو او مالدارۍ ریاست له لوري په دې ولایت کې د کرنې او مالدارۍ په برخه کې د سکتوري ادارو او مؤسسو د استازو په ګډون سکتوري غونډه ترسره شوه.
یاده غونډه دلغمان د کرنې، اوبولګولو او مالدارۍ ریاست د قدرتي سرچینو آمر او دکرنې ریاست سرپرست مولوي ګل رسول زبیر په مشرۍ جوړه شوې وه، چې پکې د یاد ریاست آمرینو ترڅنګ د اکشن اېډ، یونیفس دفتر، افغانستان لپاره د هالند کمېټې، اېسو مؤسسې، د اقتصاد او د اوبو او انژی ریاستونو استازو ګډون کړی و.
د غونډې په پیل کې د لغمان دکرنې ریاست دقدرتي سرچینو آمر مولوي ګل رسول زبیر د همکارو ادارو او مؤسسو د تېرو فعالیتونو راپورونه واورېدل او د راتلونکو پروګرامونو او طرحو په اړه معلومات ترلاسه کړل.
نوموړي د همکارو مؤسسو له مسؤلینو وغوښتل چې ټولې پروژې دې د فعالیت له پیل څخه تر پای پورې د کرنې، اوبولګولو او مالدارۍ ریاست په همغږۍ او مشورې پلي کړي. هغه همدارنګه ټینګار وکړ، چې هغو لیرې پرتو سیمو ته دې ځانګړې پاملرنه وشي، چې تر اوسه ورته کافي خدمات نه دي رسېدلي، څو د خدمتونو عادلانه وېش، متوازنه پراختیا او شفافیت یقیني شي.
ښاغلي زبیر همداراز د مؤسسو له استازو وغوښتل، چې د سکتوري غونډو په چارو کې په منظم ډول او پر ټاکلي وخت ګډون وکړي، څو د همغږۍ او همکارۍ بهیر لا پیاوړی شي.
وروسته د همکارو ادارو مسؤلینو خپلې کاري ستونزې او وړاندیزونه شریک کړل، چې د حل په موخه یې لازم تصمیمونه ونیول شول.
د یادونې وړ ده، چې د کرنې سکتوري غونډه هره میاشت یو ځل د اړوندو ادارو او مؤسسو ترمنځ د لا ښې همغږۍ، د پروژو د ښه تطبیق او د کرنیزو خدمتونو د پراختیا په موخه ترسره کېږي.