د ننګرهار وادي کرنیز امارتي شرکت او قراردادي شرکتونو ترمنځ د همغږۍ غونډه؛ د ستونزو پر حل او مالي مکلفیتونو د پوره کولو ټینګار وشو

۲ چنګاښ ۱۴۰۵ هـ.ش
۷ مُحَرَّمُ الحَرام ۱۴۴۸ه‍.ق
د ننګرهار وادي کرنیز امارتي شرکت اجرائیوي رییس، سید محمد نعیم محمدي، د هډې فارم له قراردادي کرنیزو شرکتونو د استازو سره د همغږۍ، همکارۍ او شته ستونزو د حل په موخه په خپل کاري دفتر کې غونډه ترسره کړه.
په دې ناسته کې د قراردادي شرکتونو استازو خپلې ستونزې، غوښتنې او وړاندیزونه له اجرائیوي رییس سره شریک کړل. ښاغلي محمدي د هغوی خبرې په غور واورېدې او ډاډ یې ورکړ چې د نافذه قوانینو او اصولو له مخې به د مطرح شویو ستونزو د حل لپاره لازم اقدامات ترسره شي.
د ننګرهار وادي کرنیز امارتي شرکت اجرائیوي رییس د شرکت د عوایدو د زیاتوالي، مالي نظم د پیاوړتیا او اداري چارو د لا ښه تنظیم په موخه له قراردادي شرکتونو او اجاره لرونکو وغوښتل، چې خپل پاتې پورونه او مالي مکلفیتونه پر وخت تصفیه او ادا کړي، ترڅو د شرکت اقتصادي فعالیتونه په منظم ډول پر مخ ولاړ شي.
په همدې حال کې د قراردادي شرکتونو استازو د بشپړې همکارۍ ډاډ څرګند کړ او ویې ویل، چې خپل مالي مکلفیتونه به پر ټاکلي وخت ترسره کړي او د ننګرهار وادي کرنیز امارتي شرکت سره به د ګډو موخو د تحقق، د کرنیزو فعالیتونو د پراختیا او د ادارې د پرمختګ لپاره نږدې همکاري روانه وساتي.
په یاده غونډه کې د ننګرهار وادي کرنیز امارتي شرکت د دفتر امر قاري احسان الله ذهان، د ځمکو قراردادونو لوی مدیر ذاکرالله شیرزاد او یو شمېر نورو مسؤلینو هم ګډون درلود.
د یادونې وړ ده، چې د ننګرهار وادي کرنیز امارتي شرکت مشرتابه هڅه کوي د قراردادي شرکتونو او اجاره لرونکو سره د دوامدارې همغږۍ له لارې شته ستونزې هوارې، عواید زیات او د کرنیزو او اقتصادي فعالیتونو د لا پراختیا لپاره مناسب چاپېریال رامنځته کړي.