هلمند کې د شاتو مچیو پر یوشمېر فارم‌لرونکو د شاتو پروسس ماشینونه ووېشل شول
۳۱ غویی ۱۴۰۵ه.ش
۴ ذُو الحِجَّةِ ۱۴۴۷ه.ق
د هلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت له لوري ٢٢ پایې د شاتو د پروسس ماشینونه د شاتو مچیو فارم‌لرونکو ته ووېشل شول.
یاد ماشینونه چې له پخوا راهیسې د کرنې ریاست سره موجود وو د کرنې رییس په لارښودنه، د یوې ګډې کمېټې په حضور کې مستحقو فارم‌لرونکو ته وسپارل شول.
په دغه پروسه کې د مالدارۍ او حیواني روغتیا آمر، د مچیو فارمدارانو د رییس مرستیال، منشي او د مچیو اتحادیې استازو ګډون درلود، او د اتحادیې له لوري تایید شوي ف فارم‌لرونکي ترې برخمن شول.
د مسؤلینو په وینا، د دغو ماشینونو د وېش موخه د شاتو د پروسس بهیر معیاري کول او د مچیو فارم‌لرونکو ملاتړ دی، ترڅو هغوی وکولای شي په راتلونکې کې د خپلو تولیداتو د پروسس او کیفیت د ښه والي لپاره له یادو وسایلو څخه پر وخت او اغېزمنه ګټه واخلي.
همدارنګه د یادو توکو د وېش پر مهال د هلمند دکرنې ریاست د مالدارۍ او حیواني روغتیا آمر فارم‌لرونکو ته لازمې تخنیکي سپارښتنې او لارښوونې وکړې، څو د ورکړل شوو ماشینونو سمه او مؤثره استفاده وکړي.
