د نورستان ولایت مرکز پارون کې د ژمني تېلو د جوړولو او شیندلو وقایوي پروګرام تطبیق شو
۱۹ کب ۱۴۰۴ه.ش
۲۱ رَمَضانُ المُبارَک ۱۴۴۷ه.ق
د نورستان ولایت د کرنې، اوبو لګولو او مالدارۍ ریاست د بوټو ساتنې او قرنطین ریاست د پلان او د بوټو ساتنې او قرنطین عمومي مدیریت د عملیاتي پلان پر اساس، د بوټو ساتنې او قرنطین عمومي مدیریت مسلکي کارکوونکو له لوري د ژمني تېلو د جوړولو او شیندلو وقایوي پروګرام د نورستان ولایت د مرکز پارون اړوند اشتوي کلي کې تطبیق شو.
دغه وقایوي برنامه هر کال د بوټو ساتنې مدیریت د مسلکي کارکوونکو لهخوا د دې لپاره پلي کېږي، څو د بڼونو په حاصلاتو کې د نباتي آفتونو او ناروغیو د خپرېدو کچه راکمه شي.
په دې پروګرام کې بڼوالو ته د نباتي آفتونو او ناروغیو د مخنیوي لارې چارې او د ژمني تېلو د جوړولو او شیندلو طریقه په عملي او نظري ډول وروښودل شوه، تر څو بڼوال وکولای شي په خپل وخت سره د بڼونو ساتنه ترسره کړي.
د یادو وقایوي پروګرامونو په پلي کېدو سره به نه یوازې د نباتي ناروغیو او آفتونو کنټرول یقیني شي، بلکې بڼوال به وکولای شي چې ښه، معیاري او باکیفیته حاصلات ترلاسه کړي.
د نورستان د کرنې، اوبو لګولو او مالدارۍ ریاست رییس مولوي محمد ولی محسن وویل، چې دوی هڅه کوي د کرنیزو خدمتونو د پراختیا، د بڼوالۍ د ودې او د بزګرانو د ملاتړ په موخه ورته تخنیکي او وقایوي پروګرامونه په دوامداره ډول پلي کړي.
