د کندهار ارغنداب کې پر لسګونو اړمنو کورنیو غواوې ووېشل شوې
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د کندهار دکرنې، اوبولګولو او مالدارۍ ریاست د خوړو نړۍوال پروګرام «ډبلیوافپي» په مالي او د «سياچاې» مؤسسې په تخنیکي همکارۍ ددې ولایت د ارغنداب ولسوالی پر ۳۵ بې سرپرسته او بېوزله کورنیو غواوې وېشلي دي.
د چارواکو په خبره دغه غواوې له دقیقې سروې وروسته پر هغو کورنیو وېشل شوي دي، چې اقتصادي وضعیت یې خورا خرابه او د کورنۍ سرپرستي د وړو یتیمانو پرغاړه وه.
دغه غواوې په وړیا ډول پر دوی وېشل شوي دي، چې ددې مرستې موخه د بېوزله کورنیو اقتصادي پیاوړتیا او په دې ولسوالی کې د مالدارۍ پراختیا ته زمینه برابرول دي.
د یادونې وړ ده، چې تر دې وړاندې هم د همدې دفتر له خوا، د ارغنداب ولسوالی په بېلابېلو کلیو کې پر بېوزلو کورنیو غواوې وېشل شوې وه، چې دا اقدام د کورنیو د اقتصاد د پیاوړتیا او د دوامدار عاید د سرچینې د رامنځته کولو په موخه ترسره شوی و.
د یادولو وړ ده، چې دا ډول پروګرامونه د فقر په کمولو، د اړتیا لرونکو کورنیو د معیشت په ښهوالي او د مالدارۍ سکتور په پراختیا کې اغېزمن تمامېږي او دا ډول مرستې به په راتلونکي کې هم دوام ولري.
