بلخ ولسوالی کې اړمنو مالدارانو ته د کنجاړې مرستې ووېشل شوې
۱۳ سلواغه ۱۴۰۴ه.ش
۱۴ شَعبان المُعَظّم ۱۴۴۷ه.ق
د بلخ ولایت د بلخ ولسوالی په کچه اړمنو مالدارانو ته د څارویو د تغذیې د ښه والي په موخه د کنجاړې مرستې ووېشل شوې.
دغه مرستې د آغا خان دفتر له لوري، د بلخ ولسوالی د کرنیزو خدماتو له مدیریت سره په همغږۍ او همکارۍ ترسره شوې، چې له مخې یې د یادې ولسوالی ۲۰ تنه مستحق مالداران تر پوښښ لاندې راغلل.
د چارواکو په وینا، یادې مرستې د مخکې ترسره شوې سروي او د اړمنو مالدارانو د پېژندنې پر بنسټ برابرې شوې، چې هر مستحق مالدار ته ۲۵۰ کیلو ګرامه ترکیبي متراکم کنجاړه ووېشل شوه.
د مرستې موخه د مالدارانو د څارویو د تغذیې ښه والی، د مالدارۍ سکتور پیاوړتیا او د اړمنو مالدارانو د اقتصادي ستونزو کمول ښودل شوي دي.
د یادونې وړ ده، چې د کنجاړې د وېش بهیر د اړوندو مسؤلینو تر څار لاندې په منظم او شفاف ډول ترسره شو، او همدارنګه مستحقو کسانو ته د مرستې د سم استعمال په اړه لازمې سپارښتنې هم وړاندې شوې.
