د خوست تڼیو ولسوالی کې د سرو املوکو بڼونو او بزګرانو ته د کرنیزو توکو او اصلاح شویو تخمونو وېش
۸ سلواغه ۱۴۰۴ه.ش
۹ شَعبان المُعَظّم ۱۴۴۷ه.ق
د خوست ولایت د کرنې، اوبو لګولو او مالدارۍ ریاست په چوکاټ کې، د تڼیو ولسوالۍ د کرنیزو چارو د عمومي مدیریت تر نظارت لاندې، د ملګرو ملتونو د پرمختیايي ادارې «یوانډيپي» مالي ملاتړ او د« ډبلیواېايآراو» مؤسسې په تخنیکي همکارۍ، د تڼیو ولسوالۍ اړوند اتو بېلابېلو کلیو کې د سرو املوکو بڼونو جوړولو توکي او د سیمې بزګرانو ته کرنیز وسایل او د سبو اصلاح شوي تخمونه ووېشل شول.
یاد پروګرام د کرنیزو فعالیتونو د پیاوړتیا په موخه عملي شو، چې له مخې یې د سرو املوکو بڼوالو ته اووه قلمه اړین کرنیز وسایل، چې بېلچه، رمبی، آبپاش، ریکه، ستل، کولنګ او محافظتي جامې پکې شامل وو، ووېشل شول. همدارنګه، پنځه ویشت بزګرانو ته د پیازو هایبریډ تخم، چې هر بزګر ته۲۰ ګرامه ورکړل شو، او ۲۵ نورو بزګرانو ته د بانجانو ۴۰۰ ګرامه تخم ووېشل شو.
د یادونې وړ ده، چې دا مرستې هغو بڼوالو او بزګرانو ته ووېشل شوې، چې تر دې وړاندې یې تخنیکي سروې بشپړه شوې وه. د سروې د پایلو پر بنسټ، کرنیز وسایل او تخمونه د ګټهاخیستونکو د واقعي اړتیاوو مطابق، په منظم، عادلانه او شفاف ډول ووېشل شول، تر څو د بڼوالۍ او د سبو د کرنې بهیر لا اغېزمن او معیاري شي.
د خوست د کرنې ریاست چارواکو وویل، چې د دې پروګرام اساسي موخه د سرو املوکو د بڼونو د حاصلاتو زیاتوالی، د بڼوالو د اقتصادي وضعیت ښه والی او په سیمه کې د کرنیزو فعالیتونو پراختیا ده. هغوی زیاته کړه، چې د کرنیزو وسایلو او اصلاح شویو تخمونو برابرول کولی شي د بزګرانو تولید لوړ او د هغوی عاید زیات کړي.
ګټهاخیستونکو بڼوالو او بزګرانو د یاد اقدام هرکلی وکړ، د خوست د کرنې، اوبو لګولو او مالدارۍ ریاست او همکارو مؤسسو له مرستو یې مننه څرګنده کړه او په راتلونکي کې یې د ورته همکاریو د دوام هیله څرګنده کړه.
د یادونې وړ ده، چې د همدې پروګرام په لړ کې به په نږدې راتلونکې کې د خوست ولایت په موسیخیلو، صبریو او یعقوبیو ولسوالیو کې هم د کرنیزو وسایلو او اصلاحشویو تخمونو ورته وېش ترسره شي.
