د ترینکوټ ناقل سیمې د چکډېم د چارو د ارزونې په موخه د کرنې رییس لېدنه
د روزګان ولایت د کرنې، اوبولګولو او مالدارۍ رییس مولوي عطاءالله راشد او د قدرتي سرچینو آمر مولوي عبدالمنان فاروقي د مرکز ترینکوټ ناقل سیمې د چکډېم څخه لېدنه وکړه او د یادې پروژې د تطبیق بهیر، نقشې او د کار کیفیت یې له نږدې وڅېړه.
یاد چکډېم د کرنې، اوبو لګولو او مالدارۍ وزارت له لوري له یو ودانیز شرکت سره د څه کم درې میلیونه افغانیو په لګښت قرارداد شوی دی. د لېدنې پر مهال مسؤلو کسانو د چکډېم د نقشې تطبیق، تخنیکي معیارونه او د رغنیزو چارو کیفیت وارزاوه.
د چارواکو په وینا، د چکډېم چارې په بشپړه توګه د منظور شوې نقشې له مخې روانې دي او تر دې دمه شاوخوا ۸۰ سلنه چارې یې بشپړ شوي دي. ټاکل شوې ده، چې پاتې چارې به په لنډ وخت کې بشپړې او یاد چکډېم به ګټې اخیستنې ته وسپارل شي.
ویل کېږي، چې د یاد چکډېم په بشپړېدو سره به د باراني اوبو د مهار، د ځمکې لاندې اوبو د سطحې د لوړولو او د سیمې د کرنیزو ځمکو د خوندیتوب په برخه کې مهم رول ولوبوي.
