د کندهار په دوو ولسوالیو کې د یوې چکډېم د جوړېدو او د بل د بیا رغونې چارې پیل شوې
۲ مرغومې ۱۴۰۴ه.ش
۲ رَجَب المُرَجَّب ۱۴۴۷ه.ق
د کرنې، اوبو لګولو او مالدارۍ وزارت په پراختیايي بودیجه، د کندهار د کرنې، اوبو لګولو او مالدارۍ ریاست تر رهبرۍ لاندې د کندهار د خاکریز ولسوالی د غبرګي په سیمه کې د یوه نوي چکډېم د جوړېدو چارې، او د ارغستان ولسوالی د تورغاب په سیمه کې د بل چکډېم د بیا رغونې چارې پیل شوې.
د کندهار د کرنې ریاست د قدرتي سرچینو آمریت انجنیر نورمحمد همکار وایي، چې دواړه چکډېمونه د ۲.۸ میلیونه افغانیو په ارزښت جوړېږي، چې له مخې به یې په خاکریز ولسوالی کې نوی چکډیم د ۲.۲ میلیونه افغانیو په لګښت جوړ شي او ترڅنګ به یې بل چکډېم په ارغستان ولسوالی کې د ۶۰۰ زره افغانیو په ارزښت ورغول شي او د پارچاوې چاري به یې په ښه ډول ترسره شي.
نوموړی زیاتوي، چې د خاکریز چکډېم به د درېیو میاشتو په موده کې او د ارغستان چکډېم به د یوې میاشتې په ترڅ کې بشپړ او ګټې اخیستنې ته وسپارل شي.
په ورته مهال د دواړو ولسوالیو ځايي اوسېدونکي د کرنې ریاست د دې اقدام هرکلی کوي او هیله لري، چې د یادو چکډېمونو په جوړېدو سره به د وچکالۍ ستونزې تر ډېره راکمې شي.
د چکډېمونو د جوړولو موخه د باراني اوبو مهار او زېرمه کول، د ځمکې لاندې د اوبو سطحه راپورته کول، د سیلابونو د زیانونو مخنیوی، د بزګرانو او مالدارانو د اوبو ستونزو کمول او د وچکالۍ پر وړاندې مبارزه ده.
د یادونې وړ ده، چې دا مهال د کندهار د کرنې ریاست د چکډېمونو جوړېدو چاري ګړندۍ کړې دي، ترڅو د باراني اوبو د مهار او ساتنې لپاره چکډېمونه جوړ کړي، چې په همدې لړ کې دا مهال د کندهار په کښته شاولیکوټ، لوړ شاولیکوټ، غورک او یو شمېر نورو سیمو کې هم د چکډېمونو د جوړولو چارې روانې دي.
