ننګرهار کې پر سلګونو بزګرانو د غنمو اصلاح شوي تخم او کیمیاوي سرې ووېشل شوې

۳ لیندۍ ۱۴۰۴ هـ.ش
۳ جُمَادَى الثانی ۱۴۴۷ هـ.ق
د ننګرهار د کرنې، اوبو لګولو او مالدارۍ ریاست په هڅو د نوي مشورتي او مرستندویه «ان.سي.آر.او» مؤسسې په تخنیکي او د ملګرو ملتونو د کرنې او خوړو ادارې «اف.اې.او» په مالي لګښت د ننګرهار په پنځو ولسوالیو کې ٢ زره او ٢٥٠ تنو بزګرانو ته د غنمو اصلاح شوي تخم او کیمیاوي سرې ورکړل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د ننګرهار په خوږیاڼو، بهسود، پچیراګام، شینوارو او ګوشتي ولسوالیو کې بزګرانو ته د غنمو اصلاح شوی تخم او کیمیاوی سرې پخپل وخت د ښه حاصل ترلاسه کولو په موخه ورکړل شوي.
ښاغلي محسن وویل، چې هر بزګر ته ٥٠ کیلو ګرامه د غنمو اصلاح شوي تخم، ٥٠ کیلوګرامه توره او ٥٠ کیلوګرامه سپینه سره ورکړل شوه. نوموړي زیاته کړه، چې اوسمهال بزګرانو ته په ولسوالیو کې د غنمو کرلو، ځمکي اماده کولو، ناروغیو مخنیوي، اوبو لګولو اوحاصل ټولولو په برخه کې روزنې چارې د مسلکي کارکوونکو له لورې روانې دي.