ختیځ کې دمېوو ٣٤ تصدیقي نیالګیو روزنې مرکزونو وروستۍ ارزونه ترسره شوه
٢٩ لړم ۱۴۰۴ هـ.ش
٢٩ جُمَادَى الأول ۱۴۴۷ هـ.ق
د ننګرهار د کرنې، اوبو لګولو او مالدارۍ ریاست په لارښونه د ننګرهار د تخمونو د تصدیق د ورکړې امر انجنیر نعمت الله اکبري په مشرۍ یو تخنیکي پلاوی په ننګرهار ،لغمان او کونړ ولایتونو کې د د سټروسو او سخت زړو مېوه لرونکو تصدیقي نیالګیو د وروستۍ اروزنې په موخه سفر وکړ.
د تخمونو د تصدیق ورکړې امر انجنیر نعمت الله اکبري وویل، چې ددې سفر موخه نیالګیو ته د لیبل اخېستل، د نیالګیو قبول او رد دي، چې څومره نیالګي په یادو نرسریو کې روزل شوي او څومره په معیار برابر دي.
نوموړي وویل، چې په درې واړو ولایتونو د ٣٤ تصدیقي نرسریو کې ٣٢٩ زره ٦٦٢ اصله مېوه لرونکي نیالګي روزل شوي، چې له دې ډلې څخه ٣١٠ زره ٩١٥ اصله نیالګي په معیار برابر او قبول شوي او ١٨ زره ٧٤٧ اصله نیالګي رد شوي.
د ننګرهار د کرنې ریاست بڼوالو او بزګرانودته ډاد ورکوي، چې په نیالګیو روزنې ځایونو کې غیر معیاري او نامعلومه نیالګیو ته دروزلو اجازه نه ورکوي، ترڅو بزګران او بڼوال مو د زیان سره مخ نشي.
همدارنګه ښاغلي اکبري له ټولو هېوادوالو څخه غوښتنه وکړه،کله چې نیالګي اخلي د یو اعتباري او هغه ادرس څخه یي ترلاسه کړي، چې ددولت په چوکاټ کې ثبت او نیالګیو یي د لیبل لرونکي وي.
