هلمند کې د مالدارۍ سکتور د ودې او پراختیا په پار نوې هڅې پیل شوې دي

۲۸ لړم ۱۴۰۴ هـ.ش
۲۸ جُمَادَى الأول ۱۴۴۷ هـ.ق
د هلمند ولایت کرنې، اوبولګولو او مالدارۍ ریاست د مشرتابه په لارښوونه، د مالدارۍ او حیواني روغتیا آمر حافظ هدایت الله هدایت په ځانګړو هڅو، په دې ولایت کې د لومړي ځل لپاره د غوښینو چرګانو د بازارموندنې لپاره معیاري زمینه برابره شوه.
د دې نوښت په لړۍ کې، د کرنې ریاست اړوند د مالدارۍ آمریت هغه ودانۍ چې د همدې ادارې په ملکیت کې جوړې شوې ده ، د چرګانو د پېر او پلور اتحادیې ته وسپارل شوه.
دا مرکز د لښکرګاه ښار د بولان په سیمه کې موقعیت لري او له دې وروسته به د ټول هلمند په کچه د ژوندیو او حلالېدونکو چرګانو د پېر او پلور رسمي مرکز وي.
د یاد مرکز د فعالېدو سره به نه یوازې د چرګانو د روزونکو لپاره د بازار موندنې ستونزې کمې شي، بلکې د غوښینو چرګانو عرضه به هم منظم، معیاري او د کنټرول لاندې شي.
دغه اقدام د مالدارۍ د سکتور په پياوړتیا، د کورنیو اقتصادونو په رغېدو او د چرګانو د تولید په زیاتوالي کې اغېزمن رول لري.
مسؤولینو ټینګار وکړ چې دا مرکز به د هلمند د مالدارۍ په پرمختګ کې مهمه نقطه وي او په راتلونکې کې به ورته نورې آسانتیاوې هم برابرې شي، څو په ولایت کې د چرګانو صنعت لا دود، قوي او منظم شي.