ننګرهار کې د څارویو خوندیتوب په پارهڅې؛ د ناروغیو ۵۰ نمونې واخیستل شوې

۱۹ لړم ۱۴۰۴ هـ.ش
۱۹ جُمَادَى الأول ۱۴۴۷ هـ.ق
د ننګرهار د کرنې، اوبو لګولو او مالدارۍ ریاست سره په همغږۍ د ملګرو ملتونو د خوړو او کرنې ادارې «اف.اې.او» په مرسته د ننګرهار له بېلابېلو ولسواليو د طبق او کانګو وینه بهوونکي ناروغيو مخنیوي او ټایپ معلومولو په موخه ۵۰ نمونې واخیستل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د مسلکي وټرنر ډاکټرانو له لورې د طبق ناروغۍ د ټایپ معلومولو لپاره ٣٠ او د کانګو ناروغۍ مخنیوي ٢٠ نمونې د هغو څارویو څخه واخیستل شوې، چې په ناروغیو اخته و.
نوموړي زیاته کړه، چې د وینې نمونې د لا ښې څیړنې په موخه به مرکزي لابراتوار ته واستول شي. 
د ننګرهار دکرنې ریاست چارواکي وایي، چې د مالدارۍ سکتور دپیاوړتیا، د لبني محصولاتو زیاتوالي او د کورنیو ځان بسیاینې په موخه هر کال زرګونه څارویو ته د بېلابیلو ناروغیو مخنیوی واکسینونه تطبیقوي، چې د وینې د نمونو اخیستل او ټایپ معلومول به د ناروغیو په کنټرول او ښه تشخیص کې د وترنر داکترانو سره لا ډېره مرسته وکړی.