د ننګرهار کرنيزو څېړنو د مېوو په لابراتوار کې د املوکو په مختلفو ډولونو باندې څيړنې روانې دى

 د ننګرهارد  کرنې، اوبو لګولو او مالدارۍ ریاست د کرنیزو څیړنو مدیریت له لورې په بېلا بېلو مېوو څېړنې رواني دي، چې د دې څېړنو په پايله کې به دنورو مېوو سربېره دسرو املوکو هغه انواع بزګرانو ته وپېژندل شي، چې د کيفيت او کميت له لحاظه تر نورو غوره وي او د ختيځ زون له اقلیم سره ښه توافق ولري.
د مېوو د څېړنو د لابراتوار متخصيصين وایي، چې تر دې مخکې دبڼونو دجوړولو او کرلو لپاره د غوره انواعو انتخاب کې ستونزې موجودې وې او دمېوو د غوره کرکټرونو ډيټا نه وه موجوده او که موجوده هم وه نو د نورې نړۍ له ارقامو څخه استفاده کېده کومه چې د افغانستان په خاص ډول د ختيځ زون له اقليم سره برابره نه وه او د بڼونو د کرلو څخه وروسته يى دبزګرانو او بڼوالو له ستونزو سره مخ کول چې په دې ډول څېړنو سره دا ستونزې د حل کېدو په حال کې دي او راتلوونکي کې هم نورو څېړنو ته دوام ورکوو. 
د ننګرهار د کرنې ریاست هيله لري، چې ټول همکار موسسات او ترويجي برخې چې د بڼونو جوړولو پروژې په پام لري لومړى بايد د وزارات مقام د څېړنیزو څانـګو څخه د دوې دڅېړل شوو انواعو معلومات واخلي او بيا پروژې ډيزاين کړي.
د ننګرهار په څېړنیز مرکز کې د د سرو املوکو پر ٢٤ ډولونو څیړنې روانې دي، چې د ځینو د کر سپارښتنه بزګرانو ته شوې ده.