د خوست دوو ولسوالیو کې د نویو کرل شویو بوټو او شولو کروندو څخه لیدنه وشوه

۳۰ چنګاښ ۱۴۰۴ ه‍.ش
۲۵ مُحَرَّمُ الحَرام ۱۴۴۷ه‍.ق
د خوست ولایت د کرنې، اوبو لګولو او مالدارۍ ریاست د صبریو او یعقوبیو ولسوالی کرنیزو چارو مدیرانو له خوا د یادې ولسوالی په بېلابېلو سیمو کې د کرل شوو شولو کروندو او دغه راز د ګربز ولسوالی کې د نویو کرل شویو بټو (روح افزا، نکریزو، زغر او شین چای) څخه څارنه او ارزونه ترسره شوه.
په دې لیدنه کې د کرنیزو چارو متخصصینو د کروندو وضعیت وارزاوه او ځایي بزګرانو ته یې د خړوبولو، خیشاوې، سرې ورکونې، د نباتي آفتونو او ناروغیو د مخنیوي په برخه کې مسلکي مشورې او سپارښتنې وړاندې کړې.
 دغه راز د یادې لیدنې په ترڅ کې د سیمې بزګرانو ته د نباتاتو پیوند کولو لارې چارې، شاخه بري کول او همداشان دناروغیو په پېژندنه، مخنیوی، درملنه او کنترول په اړه د یاد ریاست مسلکي کارمندانو لخوا عملي لارښونې او معلومات ورکړل شول.
 همدارنګه د ګربز په ولسوالی کې د یو تن بزګر لخوا د نوي کرل شوي (روح افزا) بوټي نتیجه او حاصل په کرل شوې ساحه کې ښه وارزول شو.
د خوست دکرنې ریاست چارواکو په خپلو خبرو کې وویل، چې دا په خوست کې د کرنې په برخه کې یو نوی ابتکار دی، چې د نورو نویو کرل شوو بوټو په څېر یې نتیجه مثبته ده.
دا په داسې حال کې ده، چې په یاده سیمه کې له دې وړاندې (شین چای، نکریزو، زغر او پلوانیا) او داسې نور با ارزښته او د هېواد په کچه کم کرل شوی نباتات کرل شوي دي، چې حاصل او نتیجه یې ښه وه.
یاده لیدنه د کروندګرو د تولید د لوړوالي، حاصلاتو د زیاتوالي او د کرنیزو خدمتونو د ښه والي په موخه ترسره شوې ده.
د خوست د کرنې ریاست مسؤلین ژمن دي، چې د ولایت په بېلابېلو سیمو کې ورته لیدنې دوامداره وساتي تر څو بزګرانو ته په وخت او مؤثرې تخنیکي مشورې وړاندې کړي.