ننګرهار کې د ۶۱۹ زره امریکایي ډالرو په لګښت د کانالونو پاک کولو چارې پیلېږي
۵ چنګاښ ۱۴۰۴ ه.ش
۲۹ ذُو الحِجَّةِ ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د ټولني پرمختیایي او څېړیزې مؤسسې «سي،ډي،آر،او» په تخنیکي همکارۍ او د «کورډېډ» مؤسسې په مالي لګښت د ننګرهار په څلورو ولسوالیو اچین، نازیان، سپین غر او دره نور کې د ۶۱۹ زره او ۸۶۴ امریکایي ډالرو په لګښت د کانالونو پاکولو او بېوزله او اړمنو کورنیو ته نغدي مرستو سروې پیلېږي.
د «سي،ډي،آر،او» پروژې مسؤل انجینر معصوم الله عارفي د ننګرهار د کرنې رییس مولوي محمد ولي محسن سره په ناسته کې د خپلو پروژو په هکله معلومات وړاندي کړل.
نوموړې وویل، چې په یادو ولسوالیو کې د کانالونو پاک کارۍ کې به ۴ زره او ۲۰۰ هېوادوالو ته د کار زمینه برابره شي، چې هر کاریګر ته به د ورځې ۴.۳۷ امریکایي ډالرو معادل افغانۍ ورځنۍمزد ورکول کېږي.همدارنګه په یادو ولسوالیو کې ۴۸۶ بېوزله، کونډو او ناچاره مېرمنو ته د خوړو خوندیتوب او کورني اړتیاوو پوره کولو په موخه هرې کورنۍ ته ۱۸۳.۷۷ امریکایي ډالرو معادل افغانۍ بلا عوضه مرسته ورکول کېږي.
د ننګرهار د کرنې، اوبو لګولو او مالدارۍ رییس مولوي محمد ولي محسن د مؤسسې مسولینو ته د مستحقو او ناچاره کورنیو د انتخاب سپارښتنې وکړې او د کرنې ادارې له لورې د همکارۍ او همغږۍ ډاډ څرګند کړ.
