د کرنې وزارت د اراضۍ لوی رياست لهخوا دوو امارتي ادارو ته ځمکه ولېږدول شوه
۱۳ غویی ۱۴۰۴ ه.ش
۵ ذُو ٱلْقَعْدَةِ ۱۴۴۶ه.ق
د کرنې، اوبولګولو او مالدارۍ وزارت د اراضۍ لوی ریاست کې جوړه شویو غونډو کې، چې د اراضۍ لوی ریاست د ځمکو د انتقال او وېش رییس مولوي سید محمد سعيد، د پوهنې وزارت د ښونځيو او املاکو د ساتنې رييس مولوي سميع الحق حماس او د ښاروالیو د همغږۍ چارو لوی ریاست تخنيکي او مسلکي رييس قاري حزب الله حدید ګډون درلود، د اراضۍ لوی رياست لخوا پوهنې وزارت او د ښاروالیو د همغږي چارو لوی ریاست ته ځمکه ولېږدول شوه.
د کرنې وزارت د اراضۍ لوی ریاست د چارواکو په خبره د پوهنې وزارت په وړانديز او د عالیقدر امیرالمؤمنین (حفظه الله تعالی) د حکم په اساس د اراضۍ لوی رياست لخوا یاد وزارت ته د بدخشان ولايت فیض آباد ولسوالۍ کې په لس جريبه ځمکه باندې د ديني مدرسې او همدارنګه غزني ولايت مرکز کې په شل جريبه ځمکه باندې د دارالعلوم د جوړولو په موخه ځمکه ولېږدول شوه.
دغه راز د ښاروالیو د همغږۍ چارو لوی رياست په وړانديز او د عالیقدر امیرالمؤمنین (حفظه الله تعالی) د حکم په اساس د اراضۍ لوی رياست لخوا یاد رياست ته د زابل ولایت مرکز کې په ۱۵ جريبه ځمکه باندې د ګنج د جوړولو او همدارنګه تخار ولايت دشت قلعه ولسوالۍ کې په ۱۰۴ جريبه ځمکه باندې په دغه ولسوالۍ کې د ښارګوټي د تطبيقي پلان د جوړولو په موخه ځمکه ولېږدول شوه.
ددغو ځمکو د لېږد ټړون د کرنې وزارت د اراضۍ لوی ریاست د ځمکو د انتقال او وېش رييس مولوي سيد محمد سعید، د پوهنې وزارت د ښونځيو او املاکو د ساتنې رييس مولوي سميع الحق حماس او د ښاروالیو د همغږۍ چارو لوی ریاست تخنيکي او مسلکي رييس قاري حزب الله حدید ترمنځ لاسلیک شو.
