کندهار کې د زرګونو کروندګرو او مالدارانو د ظرفیت لوړونې روزنیز پروګرامونه پیلېږي

۸ غویی ۱۴۰۴ ه‍.ش
۳۰ شَوّالُ المُکَرَّم ۱۴۴۶ه‍.ق
د کندهار د کرنې، اوبو لګولو او مالدارۍ ریاست د کرنیزو چارو او مالدارۍ آمریت په همغږۍ د کندهار په یو شمېر ولسوالیو کې د کروندګرو او مالدارانو د ظرفیت لوړونې روزنیز پروګرامونه پيلوي. دا پروګرامونه به د نباتي ناروغیو، افتونو، مؤثرې کرنې او سالمې مالدارۍ د ودې په موخه ترسره شي.
د کندهار د کرنې ریاست د متخصصینو او مسلکي انجنیرانو په مټ به د دامان، ډنډ، ارغستان، ارغنداب، شاولیکوټ او یو شمېر نورو ولسوالیو کروندګرو، بڼوالو او مالدارانو ته روزنیز پروګرامونه برابر شي.
په دې پروګرامونو کې به کروندګرو ته د نباتاتو د ناروغیو، افتونو د مخنیوي، د حاصلاتو د لوړولو او د مؤثرې کرنې طریقو په اړه زده کړې ورکول کېږي او مالدارانو ته به د څارویو د ناروغیو د مخنیوي او د مالدارۍ د سالمې ودې په اړه معلومات وړاندې شي.
د کرنې ریاست وايي، د روزنیزو پروګرامونو له لارې هڅه کېږي چې کروندګر او مالداران د ناروغیو او افتونو پر وړاندې پر وخت وقایوي تدابیر ونیسي او د خپلو حاصلاتو او مالدارۍ د ودې ظرفیت لوړ کړي.
دا پروګرامونه به په راتلونکو څو ورځو کې عملي شي او تمه ده چې زرګونه کروندګر، بڼوال او مالداران ترې ګټه واخلي.
تېر کال هم د کندهار په ډېرو ولسوالیو کې ورته روزنیز پروګرامونه ترسره شوي وو، چې مثبتې پایلې یې لرلې. د دغو پروګرامونو دوام به نه یوازې د نباتاتو او څارویو ناروغیو ته پر وخت او مؤثره رسیدنه یقیني کړي، بلکې د کندهار په کچه به د کرنې او مالدارۍ سکتور ته سالمه وده ورکړي.