د امارتي ادارو ګډ پلاوي د ځمکو د شخړو د څېړنې په موخه د پکتیکا تروې ولسوالۍ ته سفر وکړ

  ۳۱ وری ۱۴۰۴ ه‍.ش
۲۲ شَوّالُ المُکَرَّم ۱۴۴۶ه‍.ق
د پکتیکا د کرنې رئیس مولوي محمدزمان عمري، د سرحدونو وزارت مرستیال شیخ محمد اسماعیل غزنوي او د خوست د کرنې رئیس مولوي شیرمحمد ذبیح د کادستر تخنیکي ټیم په ملتیا د ځمکې د تثبیت او شخړې د حل په موخه تروې ولسوالۍ ته سفر وکړ.  
د دې سفر موخه په تروې ولسوالۍ کې د څو قومونو ترمنځ د ځمکې د ملکیت پر سر د رامنځته شوې شخړې تخنیکي ارزونه او حل و. ګډ پلاوي د تروې ولسوالۍ قمرالدین سیمې ته سفر وکړ، ساحه یې له نږدې وکتله او د لارښود او قانوني لایحې له مخې یې تخنیکي ارزونه ترسره کړه.  
تخنیکي پلاوي د شخړې دواړو لوریو څرګندونې واورېدې، د متصرفینو نظرونه یې ثبت کړل او د سیمې سکیچ، کوردینات او حقوقي اسناد راټول کړل. همداراز، له خلکو سره یې مخامخ خبرې وکړې، د ستونزو اصلي عوامل یې وارزول او د هواري لپاره یې وړاندیزونه ثبت کړل.
د پکتیکا د کرنې ریاست له مرکزي ادارو سره په همغږۍ هڅه کوي، چې د ځمکو حقوقي تثبیت ته زمینه برابره کړي او د امارتي ځمکو د ساتنې، ارزونې او تشخیص بهیر معیاري او شفاف ترسره کړي. دا ډول سفرونه د خلکو ترمنځ د باور فضا رامنځته کوي او د شخړو د حل مهمه وسیله بلل کېږي.