ننګرهار کې د ۵۰ زره امریکایي ډالرو په لګښت د شېدو راټولولو مرکزونه جوړ شول
۲۷ وری ۱۴۰۴ ه.ش
۱۸ شَوّالُ المُکَرَّم ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د افغان ځوانانو خدماتي مؤسسې په تخنیکي همکارۍ او د ملګرو ملتونو د ښځو چارو دفتر په مالي لګښت د ننګرهار په خوږیاڼو، شېرزاد، کامه او دره نور ولسوالیو کې د ۵۰ زره امریکایي ډالرو په لګښت د شېدو راټولولو څلور مرکزونه جوړ او لازم وسایل ورته ورکړل شول.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د افغان ځوانانو خدماتي مؤسسې له لورې دشېدو ټولولو مرکزونوته ۲۹ قلمه د لبني محصولاتو پروسس وسایل ورکړل شو او عملآ یي د پروسس چارې پیل شوي.
ښاغلي محسن زیاته کړه، چې ددې مرکزونو جوړول یوه اړتیا وه ځکه پدې ولسوالیو کې مالدارۍ ډېره او دلبني محصولاتو د پروسس او بسته بندې معیاري مرکزونو وجود نه درلوده نو د مالدارانو ستونزو حل په پار یې مرکزونه جوړ کړل.
ددغو مرکزونو جوړولو موخه د مالدارۍ سکتور پیاوړتیا، مالدارانو اقتصادې ځان بسیاینه او هېوادوالو ته باکیفیته لبني محصولاتو برابرول دي.
