د پکتیکا ګیان ولسوالی کې ۴۰ اړمنو کسانو ته د جلغوزیو راټولولو کیټونه ووېشل شول
۲۵ وری ۱۴۰۴ ه.ش
۱۶ شَوّالُ المُکَرَّم ۱۴۴۶ه.ق
د پکتیکا ولایت د کرنې، اوبو لګولو او مالدارۍ ریاست د لارښوونې له مخې، د ګیان ولسوالۍ د کرنې مدیریت په تخنیکي همکارۍ او د پرمختیايي ادارې او ار ډي په مالي ملاتړ، په ګیان ولسوالۍ کې ۴۰ اړمنو کسانو ته د جلغوزیو د راټولولو لپاره ځانګړي کیټونه ووېشل شول.
یاده مرسته د هغو خلکو د اقتصادي ملاتړ په موخه ترسره شوه، چې د جلغوزیو د ټولولو له لارې خپلې کورنۍ تمویلوي. مسؤلینو څرګنده کړه چې دغه کیټونه به د محصولاتو راټولولو بهیر اسان کړي او خلکو ته به د عوایدو ښه فرصتونه برابر کړي.
پکتیکا هغه ولایت دی چې د جلغوزیو پراخې ځنګلي سیمې لري او ډېر خلک د دغو مېوو له راټولو څخه عاید ترلاسه کوي. د کرنې ریاست هڅه کوي چې د مناسب وسایلو په برابرولو سره د خلکو لپاره کاري اسانتیاوې رامنځته کړي او د طبيعي سرچینو له لارې د دوی اقتصادي وضعیت پیاوړی کړي.
