د زیتون حاصلاتو د زیاتوالي او د آفتونو د مخنیوي لپاره درمل شیندنه روانه ده
۱۹ وری ۱۴۰۴ ه.ش
۱۰ شَوّالُ المُکَرَّم ۱۴۴۶ه.ق
د ننګرهار وادي کرنیز امارتي شرکت له‌خوا د زیتون بڼونو حاصلاتو د زیاتوالي او د مضره حشراتو لکه سیلا او نباتي ناروغیو د مخنیوي په موخه درمل شیندنه روانه ده.
د یاد شرکت د بوټو ساتنې امریت امر انجنیر شمس‌الرحمن وایي، چې دا درمل شیندنه د شرکت څلورګونو فارمونو په شمول ټولو زیتون بڼونو کې ترسره کېږي، څو ونې له آفتونو خوندي پاتې شي او راتلونکي کال کې سالم او زیات حاصل ورکړي.
نوموړي زیاته کړه، چې دغه لړۍ د مسلکي انجنیرانو تر مستقیمې څارنې لاندې پر مخ وړل کېږي او ټول نباتي او صحي معیارونه پکې رعایت شوي دي.
د یادونې وړ ده، چې سیلا یوه له هغو مضره حشراتو څخه ده، چې د زیتون ونو حاصل ته جدي زیان اړوي، خو پر وخت درمل شیندنه کولای شي د دغو آفتونو مخه ونیسي.
