پکتیکا کې د کرنې ریاست او مؤسسو ترمنځ د همغږۍ ناسته وشوه
د پکتیکا ولایت د کرنې، اوبولګولو او مالدارۍ ریاست په مشرۍ د ملي او نړیوالو مؤسسو د مسوولینو ترمنځ د همغږۍ ناسته ترسره شوه.
دا ناسته، چې د کرنې ریاست په تالار کې جوړه شوه، د مؤسسو د فعالیتونو همغږي، روانو پروژو د پرمختګ، او د خدماتو د اغېزمنتیا د لوړولو لپاره ترسره شوه. په غونډه کې د کرنې ریاست مسؤلینو او د بېلابېلو ملي او نړیوالو مؤسسو استازو ګډون درلود.
د کرنې، اوبولګولو او مالدارۍ رئیس محمد زمان عمري د ناستې ګډونوالو ته ښه راغلاست ووایه او د غونډې موخې یې تشریح کړې. نوموړي د مؤسسو د فعالیتونو پر همغږي ټینګار وکړ او ویې ویل چې د دې همکارۍ پیاوړتیا به د حکومت او مؤسسو ترمنځ اړیکې ښې کړي او د خدماتو اغېزمنتیا به زیاته کړي.
په ناسته کې د بېلابېلو مؤسسو مسؤلینو خپل کاري راپورونه وړاندې کړل، د روانو او راتلونکو پروژو جزیات یې شریک کړل او له کرنې ریاست څخه یې د ځینو خنډونو د حل لپاره د ملاتړ غوښتنه وکړه.
ښاغلي محمد زمان عمري د هر ډول همکارۍ ډاډ ورکړ او ټینګار یې وکړ، چې ټولې پروژې باید د خلکو د اړتیاوو پر بنسټ طرح او عملي شي، ترڅو د ولایت اقتصادي حالت پیاوړی شي او د خلکو باور زیات شي. نوموړي ژمنه وکړه چې له مؤسسو سره به د لا ښې همغږۍ لپاره هڅې وکړي.
د مؤسسو مسؤلینو د کرنې ریاست له دوامداره هڅو مننه وکړه او ژمنه یې وکړه چې د خپلو فعالیتونو د لا ښهوالي لپاره به خپلې هلې ځلې ګړندۍ کړي.
