هلمند کې کروندګرو ته ۱۳۰ شنې خونې جوړیږي

۳ وری ۱۴۰۴ه‍.ش
۲۳ رَمَضانُ المُبارَک ۱۴۴۶ه‍.ق
د هلمند د کرنې، اوبو لګولو او مالدارۍ ریاست چارواکي وایي چې د دې ولایت په مرکز لښکرګاه او اتو ولسوالیو کې کروندګرو ته ۱۳۰ شنې خونې جوړېږي.
ددې پروګرام په لړ کې ٣٠ بابه شنې خونې د کرنې وزارت په پراختیایي بودیجې او ١٠٠ بابه شنې خونې د ملګرو ملتونو د پراختیایي ادارې «یو،ان،ډي،پي» مؤسسې په مالي مرسته رغول کېږي.
د هلمند دکرنې ریاست چارواکي وایي، چې په هلمند کې د کرکېلې لپاره د شنو خونو له جوړېدو سره سم د بزګرو کار غوړېدلی او  د شنو خونو په جوړېدو سره د سبو کرکېلې نوې بڼه خپله کړې چې بزګرانو هم له نویو هیلو سره دغه کار ته مخه کړې ده. د دوی په خبره شنې خونې بزګرو ته ښه عاید لري.
دوى وايي، د شنو خونو په پراختيا سره کولای شي چې د هېواد یو شمېر نورو ولایتونو ته هم وخت په وخت كرنيز توکي ورسوي.
د هلمند د کرنې، اوبو لګولو او مالدارۍ ریاست چارواکي وایي، دوی په دې ولایت کې د کرنیزو حاصلاتو د لوړولو او د موسمي نباتاتو د کرکېلي د پراختیا په پار هلې ځلې کوي او د شنو خونو د حاصلاتو ښې پایلې دوی هڅولي چې د شنو خونو د جوړولو لړۍ نوره هم پیاوړې او ګړندۍ کړي.