د ننګرهار وادي کرنیز شرکت د مالدارۍ فارم کې د ورځې نږدې ۳۰۰ لیټره شیدې تولیدېږي
۱۲ کب ۱۴۰۳ه.ش
۲ رَمَضانُ المُبارَک ۱۴۴۶ه.ق
د ننګرهار وادي کرنیز شرکت چارواکي وايي، چې ددې رياست اړوند د مالدارۍ فارم، د شیدې د تولیداتو کچه د تېرکال په پرتله لوړه شوې ده. دغه فارم د ورځې لسګونه ليټره تازه شيدې توليدو او بازار ته وړاندې کوي.
د چارواکو په خبره، یاد فارم چې د هډې فارم په ۱۷ جریبه ځمه کې جوړ شوی دی، په دغه فارم کې ۳۱۱ سره څاروي موجود دي، چې په کې غواګانې، خوسکیان او غوایان ... شتون لري، چې له ډلې غواګانو څخه ۴۶ سره غواګانې هره ورځ شېدې ورکوي او د درنو هېوادوالو خدمت ته وړاندې کېږي.
د یاد شرکت د چارواکو په وینا، د فارم څارنه، د حیواناتو مناسب خوراک، او د مالدارۍ دعصري میتودونو کارول د شېدو د ښه تولید او لوړېدواساسي لاملونه دي.
مسوولین زیاتوي، چې له یاد فارم څخه د ورځې له ۲۵۰ تر ۳۰۰ لیټره شېده ترلاسه او د هېوادوالو خدمت وړاندې کېږي.
دوي وړاندې وايي، راتلونکې کې به د شېدو تولید نورهم لوړکړي، ددغه شرکت مسوولین زياتوي، د مالدارۍ صنعت ته د ودې ورکولو لپاره نوي ګامونه اخلي، چې موخه يې د مالدارۍ صنعت وده، د لبنياتو تولید لوړول، او د عصري روزنې له لارې د څارویو ساتنه ښه کول دي .
د کرنې او مالدارۍ متخصصینو په اند، د مالدارۍ صنعت ته وده ورکول کولی شي د اقتصاد پیاوړتیا ته ګټه ورسوي، همدارنګه که حکومت او خصوصي سکتور په ګډه د مالدارۍ صنعت ته پاملرنه وکړي، نو نه یوازې به مالداران ښه عاید ترلاسه کړي، بلکې د سیمې اقتصاد به هم پیاوړی شي.
