د پکتیکا مرکز ښرنې او مټاخان ولسوالیو کې د ربیز ناروغۍ د مخنیوي واکسین کمپاین پیل شو 

۱۸ لېندۍ ۱۴۰۳ه‍.ش
۷ جُمَادَى الثاني۱۴۴۶ه‍.ق
د کرنې، اوبو لګولو او مالدارۍ وزارت د څارویو روغتیا عمومي ریاست په لارښوونه، په مرکز ښرنې او مټاخان ولسوالیو کې د لیوني سپي (ربیز) ناروغۍ د مخنیوي په موخه واکسین کمپاین پیل شو. د دې پروګرام لپاره د وزارت څخه دوه تنه د اپیډیمولوژي وترنر ډاکتران ګمارل شوي وو، چې خپل ترتیب شوی پلان یې د پکتیکا ولایت د کرنې ریاست رئیس الحاج مولوي محمدزمان (عمري) او د مالدارۍ امریت مسلکي کارمندانو سره شریک کړ.  
یاد کمپاین له هغې وروسته پیل شو، چې د پکتیکا په ځینو سیمو کې د لیونیو سپیو مثبتې پېښې ثبت شوې وې. د دې ناروغۍ د مخنیوي لپاره د وزارت له لوري پکتیکا ولایت ته واکسین منظور شوی و. په کمپاین کې به کورني سپي واکسین شي او د ناروغۍ د کنټرول لپاره اړینې هڅې ترسره کېږي.  
سربېره پر دې، عامو مالدارانو ته به د ربیز ناروغۍ، خطرونو او د واکسین اهمیت په اړه هر اړخیز معلومات ورکړل شي. د کرنې ریاست رئیس الحاج مولوي محمدزمان (عمري) د یاد ټیم سره د هر ډول همکارۍ ژمنه وکړه او د پروګرام د بریالي تطبیق لپاره یې بشپړ ملاتړ څرګند کړ.