د کندهار بولدک کې د ۳۰ کیلو بېکیفیته غوښو قاچاق مخه ونیول شوه
د کندهار کرنې، اوبو لګولو او مالدارۍ ریاست د سپین بولدک کرنتین مسؤلینو او امنیتي ځواکونو په ګډه د سپین بولدک فرضي کرښې له لارې د ۳۰ کیلوګرامه بېکیفیته او بې هویته غوښو او غوایي پښو د قاچاق مخه ونیوله.
د کرنې کرنتین مسؤلینو ویلي، یو کس هڅه کوله چې یادې غوښې او غوایي پښې کندهار ښار ته قاچاق کړي او هلته یې د خوراک لپاره په پلورنځیو، قصابیو او هوټلونو وپلوري. د امنیتي ځواکونو په همغږۍ د دغه قاچاق پلان شنډ شو.
د مالدارۍ آمریت له ښاریانو، خوراک پلورنځیو او هوټل لرونکو غوښتنه کړې چې یوازې تازه غوښې له باور وړ قصابیو څخه وپيري او د چمتو شوو کوفتې او مشکوکو غوښو له پیرلو ډډه وکړي.
د یادولو وړ ده چې، په دې وروستیو کې د مالدارۍ آمریت او امنیتي مسؤلینو د بېکیفیته غوښو د قاچاق پر وړاندې جدي اقدامات روان کړي دي. یوازې تېره اونۍ د سپین بولدک فرضي کرښې له لارې ۳۷۰ کیلو بېکیفیته غوښې ضبط شوې وې.
