کندهار کې د بېکیفیته او تر وختتېرو آفت وژونکو درملو د مخنیوي کمپاین ترسره شو
د کندهار کرنې، اوبولګولو او مالدارۍ ریاست په مشرۍ، د ژړۍ ولسوالۍ د مالدارۍ مسؤلینو په همکارۍ او د نبات ژغورنې مسلکي کارمندانو لهخوا په ژړۍ ولسوالۍ او اړوندو سیمو کې د نباتي درملو پلورنځیو څارنه ترسره شوه. د دې کمپاین موخه د بېکیفیته او تر وختتېرو آفت وژونکو درملو او کیمیاوي سرو راټولول او د هغو د پلور مخنیوی و.
د دې څارنې پر مهال ګڼ شمېر تر وختتېر آفت وژونکي درمل او بېکیفیته کیمیاوي سره راټوله شوه او د بازار له لارې یې پلور بند شو.
د نبات ژغورنې مدیریت انجنیر ذبیح الله زیارمل وویل: چې دغه کمپاین د کرنې سکتور د خوندي کولو او د بېکیفیته درملو او سرو د خرڅلاو د مخنیوي لپاره ترسره شو. هغه زیاته کړه: چې ټولو پلورونکو ته سپارښتنه وشوه چې په راتلونکي کې دې د بېکیفیته او تر وختتېرو درملو له پلور څخه ډډه وکړي.
زیارمل ټینګار وکړ چې د کرنیزو محصولاتو د خوندیتوب لپاره به دا ډول څارنې په دوامداره توګه ترسره کېږي.
د یادونې وړ ده، چې تېره ورځ د کندهار مالدارۍ آمریت لهخوا د څارویو د بېکیفیته او تر وختتېرو درملو د مخنیوي لپاره هم پراخ کمپاین ترسره شوی و.
