د ننګرهار کانال امارتي شرکت رییس د هډې فارم له روغتیایي کلینیک څخه لیدنه وکړه
۲۳ لړم ۱۴۰۳ه.ش
۱۱ جُمَادَى الأول ۱۴۴۶ه.ق
د ننګرهار کانال امارتي شرکت عمومي رییس سید محمد نعیم «محمدي» د بهسودو ولسوالۍ د روغتیا د برخې مسوول ډاکتر سمیع الحق په ملتیا د هډې فارم روغتیايي کلینیک څخه د لیدنې په ترڅ کې د کلینیک ستونزې او اړتیاوې وڅیړلې او اړوندو مسوولینو ته یې د حل په برخه کې لازمې لارښوونې وکړې.
دغه روغتیايي کلینیک، چې په دوه جریبه ځمکه کې د هډې فارم امریت ترڅنګ د دې ادارې له جوړېدو سره سم فعال شوی، هره ورځ د ننګرهار کانال امارتي شرکت کارکوونکو او نورو هېوادوالو ته پراخ روغتیايي خدمتونه وړاندې کوي.
د کلینیک مسوول ډاکتر خوشحال وایي چې دا کلینیک، د مور او ماشوم روغتیا، داخلې او تغذیې، واکسین، لابراتوار، جراحي، نري رنځ او نورو برخو کې د ننګرهار کانال امارتي شرکت کارکوونکو او نورو هېوادوالو ته روغتیایي خدمتونه وړاندې کوي.
