ننګرهار کې د ځنګلونو ساتنې په موخه د دره نور ولسوالی مسؤلینو او قومي مشرانو سره سلا مشورې وشوې

۱۵ لړم ۱۴۰۳ه‍.ش
۳ جُمَادَى الأول ۱۴۴۶ه‍.ق
د ننګرهار د کرنې، اوبو لګولو او مالدارۍ رییس او د ځنګلونو ساتنې کمیټې مشر مولوي محمد ولي محسن او د کمېټې نورو مسؤلینو د دره نور ولسوالی سیمه ییزو مسؤلینو او قومي مشرانو سره د ځنګلونو ساتنې، بیارغونې او دلرې پرتو کلیو د ولسونو ستونزو تشخیص او ورته د حل لارې پیداکولو په موخه وکتل.
د ننګرهار د کرنې، اوبو لګولو او مالدارۍ رییس مولوي محمد ولي محسن ځنګلونه د هېواد مهمي ملي شتمني یادې کړي او د ولسونو څخه یي د ساتنې او بیا رغولو کې د همکاریو د غوښتنو ترڅنګ د کرنې، اوبو لګولو او مالدارۍ وزارت د کړنلارو او ځنګلونو ساتني طرزالعملونو د تطبیق او خلکو ته ځنګلونو ارزښت، ساتني او ځنګلونو پریکولو مخنیوي او سلا مشورو په موخه وکتل.
ښاغلي محسن قومي مخورو ته وویل ستاسو د ستونزو تشخیص، ځنګلونو د پریکولو مخنیوی،ځنګلونو بیا رغولو،ساتني او نورو اړونده برخو معلومات به راټول او د کرنې وزارت مقام سره د یو تفصیلي راپور په شکل شریک کړي.
د دره نور ولسوالی قومي مخورو خپلې ستونزې، غوښتنې او وړاندیزونه د ځنګل ساتني کمیټې مسؤلینو سره شریکي کړلې او هم یي د ځنګلو ساتلو او بیا رغولو په برخه کې د پوره همکارۍ ډاډ ورکړ.
قومي مخورو وویل، داچې د دره نور ولسوالی اراضي غریزه ده او هموارې ځمکي کمې دي نو دې ولسوالی ته باید د مالدارۍ، حیواني خوراکي، چینجیو ضد درملو، واکسینونو، شاتو مچیو او داصلاح شوي تخمونو، کیمیاوي سرو او نورو اړونده برخو کې جدي پاملرنه وشي.
د ننګرهار د کرنې، اوبو لګولو او مالدارۍ رییس مولوي محمد ولي محسن قومي مشرانو ته په ټولو قانوني چارو کې د هر راز همکارۍ او همغږۍ ډاډ څرګند کړ.
د ځنګلونو ساتنې ولایتي کمیټه چې د کرنې رییس په مشرۍ جوړه شوی ده په ترکیب کې د ننګرهار ولایت مقام، علمآؤ شورا، استخباراتو، قول اردو اوقومندانۍ استازي برخه لري، چې د ځنګلونو د ساتنې لپاره د ولسوالیو مسؤلینو او قومي مخورو سره سلا مشورې ترسره کوي.