د ننګرهار کانال امارتي شرکت د ځمکو د داوطلبۍ مرحله پیل شوه
۶ لړم ۱۴۰۳ه.ش
۲۴ رَبِیعُ الْثاني ۱۴۴۶ه.ق
د ننګرهار کانال شرکت د ځمکو داوطلبۍ د لړۍ په ترڅ کې، د هډې فارم امریت اړوند د ځمکو داوطلبۍ پروسه په علني، شفاف او ازاده بڼه ترسره شوه، چې ورسره د ننګرهار کانال امارتي شرکت د ځمکو د داوطلبۍ بهیر هم پیل شو.
دا پروسه د ننګرهار کانال امارتي شرکت رییس سید محمد نعیم «محمدي» په مشرۍ ترسره شوه، چې ورسره د سوداګرۍ او بازارموندنې ریاست اړوند املاکو امریت د اجاره ورکولو لوی مدیر نبي جان، د داخلي تفتیش لوی مدیر امیرشاه «زهیر»، د حقوقي چارو کارپوه شبیر احمد، د مطبوعاتو لوی مدیر سید همایون غریبمل، د هډې فارم امریت مدیر انجنیر عبید او نور اړوند مسوولین هم موجود و.
د ننګرهار کانال شرکت رییس په دې اړه وویل: "د خلکو لپاره د ځمکو عادلانه وېش د لنډ مهالې او اوږد مهالې اجارې په بڼه، د سیمې د وګړو لپاره د کار زمینه پیدا کول او د ننګرهار کانال شرکت د ۴ ګونو فارمونو شته ځمکې کرنې لاندې راوستل د دې پروسې ستره موخه ده. چې د کورني او ملي اقتصاد پیاوړي کولو لپاره به ګټور وي."
