د هلمند ناوه کې ۱۰ تنه د طبیعي کبانو نیولو په تور ونیول شول
٢١ تله ۱۴۰۳ه.ش
٩ رَبِیعُ الْثاني ۱۴۴۶ه.ق
په هلمند کې د طبیعي کبانو د نسل د ساتنې په موخه، د دې ولایت کرنې، اوبولګولو او مالدارۍ ریاست د کبانو ښکار بند کړی دی. د دې بندیز د تطبیق په موخه د ناوې ولسوالۍ کرنې او امنیتي مسؤلینو په همکارۍ، د مالدارۍ او د څارويو روغتیا آمریت مسؤلینو له خوا ۱۰ تنه د طبیعي کبانو ښکاریان نیول شوي او دا مهال په توقیف کې دي.
نیول شویو کسانو د کرنې ریاست د عامه خبرتیاوو سربېره، په ناوې ولسوالۍ کې د بېلابېلو وسیلو په کارولو سره د عامو سیندونو او کانالونو کبان نیولي و. د کرنې او امنیتي مسؤلینو په ګډه همکارۍ دغه ښکاریان ونیول شول.
هلمند ولایت زرګونه فعال د کب روزنې فارمونه لري او د کبانو د غوښې په برخه کې په ځان بسیا دی. له دې امله، له دې وروسته هیڅوک حق نه لري چې د طبیعي کبانو ښکار په خپل سري توګه ترسره کړي.
