ننګرهار کې د لمریزې برېښنا ۲۵ پايې بېرته نصب شوې

۱۴ تله ۱۴۰۳ه‍.ش
۲ رَبِیعُ الْثاني ۱۴۴۶ه‍.ق
د ننګرهار وادي کرنیز امارتي شرکت د اوبولګولو تخنیکي ساتنې او څارنې امریت وایي، چې تېرو اورښتونو او طوفان له امله چپه شوې ۲۵ د لمریزې برېښنا ستنې بېرته نصب او وصل شوې دي.
د یاد آمریت امر انجنیر ګل احمد وویل: د شرکت د رییس په ځانګړې پاملرنه او د تخنیکي ټیم د هڅو په پایله کې دغه پايي بېرته ودرول شوې. نوموړي زیاته کړه چې په دې پروسه نږدې نهه سوه زره افغانۍ لګښت راغلی او په فعالېدو سره به یې دوه زره هکتاره ځمکو ته په وخت اوبه رسېږي، چې د ګڼو کرنیزو تولیداتو زیاتېدو لامل به شي.
د یادولو وړ ده، چې په دې لمریزې برېښنا د ننګرهار کانال امارتي شرکت د دویم پمپ سټیشن واټرپمپونه هم فعالېږي او له دې سره به  ۱۰ زره جریبه (۲ زره هکتاره) ځمکې اوبو ولري.  
د شرکت رهبري له تخنیکي کارکوونکو مننه وکړه او په یاد مسیر کې یې له مېشتو کروندګرو چې د برېښنا په نشتون کې یې زغم کړی، هم قدرداني وکړه.