د دوو جوماتونو د ځمکې د لېږد تړون د کرنې وزارت د اراضۍ لوی رياست او د ارشاد، حج او اوقافو وزارت ترمنځ  لاسلیک شو

۲۶چنګاښ ۱۴۰۳ه‍.ش
۱۰ مُحَرَّمُ الحَرام ۱۴۴۶ه‍.ق
دکرنې، اوبولګولو او مالدارۍ وزارت د ځمکو چارو ریاست او د ارشاد، حج او اوقافو  وزارت ترمنځ؛ د دوو جوماتونو جوړولو لپاره د ځمکې د لېږد تړون لاسلیک شو.
دغه تړون د کرنې وزارت د ځمکو چارو لوی رییس مولوي محمود مظلوم او د ارشاد، حج او اوقافو وزارت د اوقافو رییس نور الله غفوري ترمنځ د ځمکو د تنظيم او وېش رییس مولوي سید محمد سعید، په شتون کې لاسلیک شو.
د کرنې، اوبولګولو او مالدارۍ وزارت د ځمکو چارو لوی ریاست چارواکي وایي، چې د ټولګټو وزارت د (۱۵۹۹) ګنې د ۲۶/۶/۱۴۴۵ نېټې وړانديز او د عالیقدر امیرالمؤمنین (حفظه الله) د (۴۴۳۵) ګنې د ۲۸/۸/۱۴۴۵ نېټې حکم په اساس په هلمند ولایت کې د ۶ جریبه ځمکې د لېږد تړون لاسلیک شوی دی.
 دکرنې وزارت د ځمکو چارو ریاست د چارواکو په خبره ددې تړون له مخې د هلمند ولایت په واشير ولسوالی سنګيلان تپه او شاول مانده کلیو کې په درې درې جریبه ځمکه د جوماتونو د جوړولو په موخه د اراضۍ رياست لخوا د ارشاد، حج او اوقافو وزارت ته ځمکه لېږدول کېږي.