هلمند کې د غنمو کفشک حشرې او نورو نباتي ناروغیو د مخنیوي چارې پیل شوې
۱۸ وری ۱۴۰۳ه.ش
۲۷ رَمَضانُ المُبارَک ۱۴۴۵ه.ق
دهلمند ناوې ولسوالی کې د کرنې ادارې اړوند بوټو ساتنې مدیریت مسلکي کارکوونکو لخوا د غنمو د کفشک حشرې او نورو نباتي ناروغیو او افاتو میخانیکي مخنیوي کمپاین پیل شوی دی، چې په ترڅ کې به یې زرګونه هکټاره د غنمو کروندې له یادې حشرې څخه پاکې شوې.
د غنمو د وږي په مرحله کې د كفشك حشره د غنمو له شيرې، پاڼو، تنې او دانې څخه تغذيه كوي، او پر همدې وخت دا حشره د غنمو دانو ته زهري مواد داخلوي، چې له مخې یې د غنمو کیفیت او کمیت خرابېږي.
د کرنې ریاست د پلان له مخې به د یادې حشرې د مخنیوۍ میخانیکي کمپاین دهلمند مرکزي سیمو ترڅنګ په ګڼو ولسوالیو کې په لاره واچول شي، ترڅو د کرونده کرو دغنمو کښتونه دنوموړي آفت څخه خلاص او د باکیفیته حاصلاتو لرونکی وي.
ددې تر څنګ د یوشمېر نباتي ناروغیو او افاتو نمونې به له ولسوالیو څخه مرکز لښکرګاه ته په دې موخه انتقال شي، چې دلته ورباندې لابراتواري ازموینه او تجربې ترسره شي، ناروغۍ او افاتونه یې تشخیص او په مقابل کې به یې کرونده ګرو ته لازمې سپارښتنې او عملي روزنې ورکړل شي.
