کندهار کې د موسمي سبو د دودولو په موخه شنې خونې جوړېږي
۸ وری ۱۴۰۳ه.ش
۱۷ رَمَضانُ المُبارَک ۱۴۴۵ه.ق
کندهار د هېواد د تودې هوا لرونكى او يوازې د اوړي په موسم كې د سبو او نيالګيو د موسمي فصل له مخې مشهور ولايت دى، خو د دغه ولايت دکرنې ریاست هلې ځلې کوي، چې د شنوخونو په جوړولو او دودولو سره ددې ولایت بزګران د کال په ټولو موسمونو کې هم کولای شي، چې په خپلو شنوخونو کې د سبو او ترکاریو کرکېله وکړي او ددې ولایت د اړتیا پوره کولو ترڅنګ یې نورو ګاونډو ولایتونو ته هم صادر کړي.
د کندهار دکرنې، اوبولګولو او مالدارۍ ریاست چارواکي وایي، چې په دې ولایت کې د شنوخونو دودولو په موخه د کندهار ښار تر څنګ په دامان، ډنډ، خاکريز او ژړۍ ولسواليو کي په ازمايښتي ډول پنځه شنې خونې جوړيږي، چي پر هره خونه ۱۷۰ زره افغانۍ لګښت راځي.
ورته مهال د کندهار کروندګر د شنو خونو جوړېدل د کرنې سکټور د ودې لپاره ګټور بولي.
په كرنيز سيسټم كې له شنو خونو څخه لاسته راغلي حاصلات ګټور، خوندور او په بازار كې هم ډېره ګټه د کروندګرو په برخه کوي.
د کندهار د کرنې، اوبولګولو او مالدارۍ ریاست چارواکي وایي، دوی په دې ولایت کې د کرنیزو حاصلاتو د لوړولو او د موسمي نباتاتو د کرکېلي د پراختیا په پار هلې ځلې کوي.
