د تورخم بندر د قرنطین ودانۍ ګټې اخیستنې ته وسپارل شوه

د ننګرهار دکرنې، اوبولګولو او مالدارۍ ریاست چارواکي وایي، چې ددې ولایت د تورخم په بندر کې د حیواني او کرنیزو توکو د قرنطین ودانۍ چارې بشپړ او ګتې اخیستنې ته سپارل شوی دی.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې د تورخم حیواني او کرنیز قرنطین ودانۍ چې د اسلامي امارت په ۷.۴ میلیونه افغانیو په لګښت جوړه شوه حیواني او نباتي لابراتوارونه، اداري خونې، تشنابونه، پخلنځي او ۲۱۶ متره په اوږدوالی فینس وال لري.
ښاغلي محمد زیاته کړه ددي ودانۍ په جوړېدو سره به د نړۍوال سوداګریز مرکز د قوانینو مطابق د نړۍ سره د ښه تعامل پر بنآ صادرات او واردات ولرو.
نوموړي وویل د قرنطین د نورو برخو فعالیدو سره به د تورخم بندر له لارې واردیدونکو حیواني او کرنیز محصولاتو نمونې د تشخیص په موخه اخیستل کېږي او هغه حیواني او کرنیز توکي، چې له افغانستان څخه صادرېږي د نړۍوالو اصولو لمخې چک او سرټفیکیټ به ورکول کېږي.
د یادې ودانۍ د ګټې اخیستنې په مراسمو کې د ننګرهار دکرنې، اوبولګولو او مالدارۍ رییس مولوی عبدالستار محمد سربېره، د تورخم کمیسار حاجي ملا حکمت، تورخم ګمرک امر قاري رفیع الله پاچاخان، د شرکت مسولینو، کرنې ریاست امرینو، تورخم استخباراتو او ترانسپورت استازو ګډون درلود.