د هلمند والي ددې ولایت د کرنې ریاست له اړونده ملکیتونو او تاسیساتو څخه لیدنه وکړه
۱۷ کب ۱۴۰۲ه.ش
۲۵ شَعبان المُعَظّم ۱۴۴۵ه.ق
د هلمند ولایت والي الحاج مولوي عبدالرحمن مسلم کندزي په داسې حال کې چې د هلمند ولایت د کرنې، اوبولګولو او مالدارۍ رییس مولوي نیازمحمد وهاج یې هم ملتیا کوله د بولان په سیمه کې له بېلابېلو سیمو څخه لیدنه وکړه.
ددې لیدنې په ترڅ کې د هلمند والي د بولان طبیعي ځنګل د ٧٠٠ جریبه ځمکې له ځینو برخو لیدنه وکړه د یاد ځنګل د لا بهبود په موخه مسؤلینو ته لازمې سپارښتنې وکړې.
دغه راز ښاغلی کندزي د بولان انارباغ د نیالګیو له روزن ځای څخه لیدنه وکړه، هلته یې د چمتو شویو نیالیګو او د راتلونکي کال لپاره د نویو نیالګیو روزلو چارې وارزولې او د کرنې ریاست له هڅو یې ستاینه او ملاتړ څرګند کړ.
د هلمند والي همداراز د بولان سیمه کې د ملت په نوم تفریحي پارک څخه لیدنه وکړه، هلته یې د پارک د رغولو نوې چارې له نږدې وکتلې د یاد پارک قراردادي شرکت مسؤلینو ته یې په ځینو برخو کې سپارښتنې وکړې او هغوی ته یې له خپله اړخه د همکارۍ ډاډ ورکړ
