کندهار کې له سیمه ییزو وټرنرانو سره د اړینو توکو مرسته وشوه
٩ سلواغه ۱۴۰۲ه.ش
١٧ رَجَب المُرَجَّب ۱۴۴۵ ه.ق
د کندهار دکرنې، اوبولګولو او مالدارۍ ریاست د افغانستان لپاره د هالینډ کمېټې په همکارۍ ددې ولایت پر يوشمېر سیمه ییزو وټرنرانو د څارویو درمل او اړین توکي وېشلي دي.
د کندهار دکرنې ریاست د مالدارۍ او حیواني روغتیا آمریت چارواکي وایي، چې په دغو وېشل شویو توکو کې ٤٧ قلمه درمل،٤٣ قلمه لوجستیکي اجناس، ٥٤ قلمه ډول دول تخنیکي توکي او موټر سایکیلونه شامل دي.
د چارواکو په خبره یاد وټرنران، چې د شپږ میاشتنۍ درسي او عملي زده کړو وروسته فارغ شوي دي، د کندهار ولایت په درېیو ولسوالیو میوند، خاکریز او ارغستان کې به د حیواني کلينيکونو له لارې خلکو ته چوپړتیاوې وړاندې کوي.
ددغو مرستو موخه د مالدارانو ملاتړ او په ټوله کې ددې ولایت د مالدارۍ سکټور ودې او پراختیا ته زمینه برابرول دي.
