هلمند کې زرګونو وړو شخوند وهونکو څارویو ته د واکسین ورکولو چارې پیل شوې
۸ سلواغه ۱۴۰۲ه.ش
۱۶ رَجَب المُرَجَّب ۱۴۴۵ ه.ق
دهلمند ولایت د کرنې، اوبولګولو او مالدارئ رياست د افغانستان لپاره د هالنډ کمیټې په مالي مرسته زرګونو وړو شخوند وهونکو څارویو ته د ریخک ناروغۍ مخنیوی په پار د واکسین د تطبیق کمپاین پیل کړی دی.
د یاد کمپاین په ترڅ کې د مرکز لښکرګاه، ګرشک، نادعلي، مارجې، باباجي، نهرسراج، سنګين او کجکي ولسواليو کې شاوخوا ٣٤٧٧٥ رآسه وړو شخوند وهونکو څارویو ته د (انتراتوکسیمیا) یا ریخک ضد واکسین تر سره کېږي.
یاده ناروغي چې په بېلابېلو وختونو کې په وړو شخوند وهونکو څارویو کې رامنځته کېږي، له امله یې مالدارانو ته پراخه مالي زیان اوړي، په همدې موخه ددې لپاره چې د هلمند ولایت کوچیان او مالداران د یادې موسمي ناروغۍ له زیان څخه خوندي شي کرنې ریاست دغه کمپاین په لاره اچولی دی.
د یادولو وړ ده، چې د یاد واکسین د کمپاین چارې به مستقیمآ د کرنې ریاست له لوري څارل کېږي، تر څو په معیاري توګه ټولو سیمو ته په سمه توګه رسېدنه ووشي.
