کندهار کې زرګونه مالداران او فارم لرونکي وروزل شول
۲۱ مرغومې ۱۴۰۲ه.ش
۲۹ جُمَادَى الثاني ۱۴۴۵ ه.ق
د کندهار دکرنې، اوبولګولو او مالدارۍ ریاست د افغانستان پرمختیایي مؤسسې په همکارۍ ددې ولایت د شاه ولیکوټ، ژړۍ او ډنډ ولسوالیو کې درې زره او ۵۲۶ مالداران، فارم لرونکي او کوچیان په بېلابېلو برخو کې روزلي دي.
د کندهار دکرنې ریاست د مالدارۍ او حیواني روغتیا آمریت چارواکي وایي، چې یاد مالداران، فارم لرونکي او کوچیان د څارویو د ناروغیو نښو، وقایې، درملنې، د داخلي پرازیتونو مخنیوي لارې چارې، د حیواني محصولاتو زیاتوالی او د لبنیاتو په برخه کې روزنه ورکړل شوي دي.
ددغو روزنیزو پروګرامونو موخه د مالدارانو، فارم لرونکو او کوچیانو وړتیاوې لوړول او په ټوله کې ددې ولایت د مالدارۍ سکټور ودې او پراختیا ته زمینه برابرول دي.
د کندهار دکرنې، اوبولګولو او مالدارۍ ریاست هلې ځلې کوي، چې د بېلابېلو روزنیزو پروګرامونو په پلي کولو سره ددې ولایت د مالدارانو د پوهې کچه لوړه او اقتصادي ودې ته یې زمینه برابره کړي.
