لغمان کې د وحشي ژویو او خوندي شویو سیمو ساتنې په پار هلې ځلې
۱۹ مرغومې ۱۴۰۲ه.ش
۲۷ جُمَادَى الثاني ۱۴۴۵ ه.ق
د لغمان دکرنې، اوبولګولو او مالدارۍ ریاست په دې ولایت کې د وحشي ژویو او خوندي شویو سیمو ساتنې په پار د هلو ځلو په ترڅ کې ددې ولایت د دولت شاه ولسوالی ګډیالي سیمې څخه د لیدنې په ترڅ کې د یادې سیمې د ساتنې په پار اړوندو چارواکو ته لازمې لارښوونې وکړې.
د لغمان دکرنې، اوبولګولو او مالدارۍ ریاست د چارواکو په خبره د دولت شاه ولسوالی د ګډیالي سیمه د ساتل شویو سیمو په ډله کې ده، چې په کې پراخ ځنګلونه، د جلغوزیو ونې، طبیعي ښکلا او سیاحت لپاره مناسب چاپېریال لري.
ددې لیدنې په ترڅ کې د ګډیالې سیمې له ولسونو سره د ناستې پر مهال د ساتل شویو سیمو په اهمیت، ساتنه، دځنګلونو د پرېکېدو مخنوی، د وحشي ژویو او د ځنګلونو د اهمیت او ارزښت په اړه خبرې اترې وشوې.
ددې ناستې په ترڅ کې دغه راز د ګډیالې سیمي قومي مشرانو یو شمېر ستونزې او غوښتنې د لغمان دکرنې ریاست له پلاوي سره شریکې کړې.قومي مشرانو وویل: « موږ ځنګل ساتنې له پاره قومي تړون لرو، او همدې تړون لا ښه عملي کولو له پاره لس نفره ناغګیران ټاکل شوي دي. چې د یاد ځنګل سمه ساتنه به کوي او هیچا ته به ددې اجازه نه ورکوي چې ځنګل پرې کړي.»
