پکتیکا کې د ځنګلونو وهنې د مخنیوي په پار هلې ځلې
۱۶ مرغومې ۱۴۰۲ه.ش
۲۴ جُمَادَى الثاني ۱۴۴۵ ه.ق
د پکتیکا دکرنې، اوبولګولو او مالدارۍ ریاست چارواکي وایي، چې دکرنې وزارت د هدایت پر اساس یې په دې ولایت کې د ځنګلونو وهنې او لرګیو قاچاق د مخنیوي په پار هلې ځلې چتکې شوي دي.
د دغو هلوځلو په دوام د پکتیکا دکرنې، اوبولګولو او مالدارۍ په ریاست کې د اړوندو ادارو ترمنځ د غونډې په ترڅ کې د پکتیکا ولایت د اوسیدونکو د سون توکو د ستونزو حل او نورو موضوعاتو باندې خبرې اترې وشوې.
په دې غونډه کې، چې د پکتیکا دکرنې رییس ترڅنګ ددې ولایت د مقام، استخباراتو، امنیه قومندانۍ، چاپېریال ساتنې، علماؤ شورا او صنعت او سوداګرۍ ریاستونو استازي هم ګډون درلود د ځنګلونو د وهنې مخنوی، خوندیتوب او پراختیا ترڅنګ د پکتیکا اوسیدونکو د سون توکو پر ستونزې هم خبرې اترې وشوې.
په دې غونډه کې پرېکړه وشوه، چې د مرغومې له ۱۶ د سلواغې تر ۱۶ نیټې پورې دې د پکتيکا ولايت د مرکز په ګډون په ټولو ولسواليو کې پرتې وچې لرګي دي د ننه په ولایت کې هرې سیمې ته ولېږدول شي.دغه راز په دې غونډه کې پرېکړه وشوه، چې د شنو لرګيو وهل او انتقال دواړه مطلق بند دي که يې په اړوند څوک ونيول شي بايد جزايې ارګانونو ته معرفي شي،ټوله پکتيکا کې دي د امنيه قوماندانۍ ،استخباراتو ، کرنې او شنې قطعې مسؤلين په خپلو اړونده سیمو کې د يادو کړنو کلکه څارنه وکړي او د پکتيکا ولايت څخه دي د وچو لرګيو د لېږد مخه ونیسي.
