د کندهار دکرنې رییس د دې ولایت د چرګانو پالنې د ټولنې له رییس سره وکتل
۱۶ مرغومې ۱۴۰۲ه.ش
۲۴ جُمَادَى الثاني ۱۴۴۵ ه.ق
د کندهار دکرنې، اوبولګولو او مالدارۍ رییس مولوی فضل الباري فضلي د خپل کار په دفتر کې د نباتاتو حفاظت او قرنطین رییس انجینر عتیق الله مسلم په شتون کی د کندهار ولایت د چرګانو پالنې د ټولنې رییس حاجي عبدالرازق سره په کتنه کې ددې ولایت د چرګانو پالنې سکټور پر فرصتونو، ننګونو او ستونزو خبرې اترې وکړې.
ددې کتنې په ترڅ کې د کندهار دچرګانو پالنې د ټولنې رییس حاجي عبدالرازق په دې ولایت کې د چرګانو پالنې سکټور د فعالیتونو او کړنو په هکله د کندهار دکرنې رییس ته معلومات وړاندې کړل او ترڅنګ یې د کندهار د کرنې له رییس څخه یې وغوښتل، چې له بهر د چرګانو د غوښو پر وارداتو بندیز ولګول شي او دغه راز چرګان په مناسبه بیه بازار ته وړاندې شي.
په همدې حال کې د کندهار دکرنې، اوبولګولو او مالدارۍ رییس الحاج مولوی فضل الباري فضلي وویل، چې د کرنې وزارت ژمن دی، چې په ټولو برخو کې خصوصي سکټور سره همکاري وکړي او دوی ته هر اړخیزې اسانتیاوې برابرې کړي.
ښاغلی فضلي د کندهار د چرګانو پالنې د ټولنې رییس ته د هرراز همکاریو ډاډ څرګند او وویل، چې دکندهار دکرنې ریاست چمتو دی، چې دوی سره په هره برخه کې مرستې او همکاري وکړي.
