نورستان کې پر لسګونو مالدارانو د څارویو خوراکي توکو وېش لړۍ پیل شو
۱۲ مرغومې ۱۴۰۲ه.ش
۲۰ جُمَادَى الثاني ۱۴۴۵ ه.ق
د نورستان د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د افغانستان راتلونکې نسلونو مؤسسې په همکارۍ ددې ولایت د مرکز پارون ترڅنګ د واما، وایګل او مندول ولسوالیو پر ۷۰۰ مالدارو کورنیو د څارویو د خوراکي توکو وېش لړۍ پیل شوی دی.
د نورستان دکرنې ریاست د چارواکو په خبره ددې پروسې په ترڅ کې هرې کورنۍ ته ۲۰۰ کیلوګرامه د څارویو خوراکي توکي، درې کیلو ګرامه د شوتلو تخم، د داخلي چنجیو ضد درمل او دغه راز د ۹۶ ډالرو معادل افغانۍ ورکول کېږي.
ددې مرستې موخه د بېوزله مالدارانو ملاتړ، د څارویو د محصولاتو زیاتولی، د کورنیو اقتصادي پیاوړتیا او په ټوله کې ددې ولایت د مالدارۍ سکټور ودې او پراختیا ته زمینه برابرول دي.
