پکتیا کې د ځنګلونو وهنې مخنیوی په پار غونډه دائره شوه

٢۸ لیندۍ ۱۴۰۲ه‍.ش
۶ جُمَادَى الثاني ۱۴۴۵ ه‍.ق
د پکتیا دکرنې، اوبولګولو او مالدارۍ ریاست وایي، چې ددې ولایت د ځنګلونو د غیر قانوني وهنې او پرې کولو مخنیوی په پار د پکتیا ولایت د ولسوالیو چارواکو او قومي مشرانو سره د ولایت په مقام کې غونډه دائره شوه.
دغه غونډه، چې د پکتیا جرګو تالار کې جوړه شوې وه، د پکتیا مرستیال والي مولوي انعام الله صلاح الدین، امنیه قوماندان مولوي محمدعمر مخلص، د کرنې، اوبولګولو او مالدارۍ رییس مولوي عبدالروف سعید، د مرافعیې محکمې، امر بالمعروف او د چاپېریال ساتنې ریاستونو رییسانو، د بېلابېلو ولسوالیو ولسوالانو، امنیه قومندانانو د کرنیزو چارو مدیرانو او ګڼ شمېر قومي مشرانو پکې ګډون کړی و.
د پکتیا مرستیال والي مولوی انعام الله صلاح الدین یادې غونډې ته د خپلې وینا په ترڅ کې وویل، چې د شنو ونو او ځنګلونو ساتنه او خوندیتوب د امیرالمومنین حفظه الله حکم دی او ساتنه یې په موږ تاسو فرض ده او باید په کلکه یې ساتنه وکړو.
د نوموړي په خبره اسلامي امارات د شنو ونو او ځنګلونو ساتنې په موخه د شنې قطعې په نوم ځانګړې قطعه جوړه کړې خو ترڅنګ یې په دې برخه کې د قومونو همکاري هم مهمه وبلله او هیله وښوده، چې ولسونه د شنو ونو ساتلو برخه کې له حکومت سره په بشپړ ډول همکار اووسي.
په ورته وخت کې د پکتیا امنیه قوماندان وویل: «د شنو ونو وهلو مخنیوی په موخه د امیرالمومنین حفظه الله فرمان د ولسونو او د هېواد په ګټه ده، باید ټول یې په ګډه ساتنه وکړو.» د پکتیا امنیه قوماندان ښاغلي مخلص وویل؛ شنه قطعه د قومندانۍ اړوند ده او تر اوسه یې خپل مسؤلیت په ښه ډول ترسره کړی او غوښتنه یې وکړه، چې له دې قطعې سره ولسونه پوره همکاري وکړي.
ورپسې د پکتیا ولایت د کرنې، اوبو لګولو او مالدارۍ رییس مولوی عبدالرؤف سعید په خپلو خبرو کې وویل، چې ځنګلونه دهېواد ملي شتمني ده او ګډونوالو ته یې د ځنګلونو د وهلو مخنیوی اړوند د امیرالمومنین حفظ الله فرمان پر تطبیق ټینګار وکړ او زیاته یې کړه، چې د شنو ځنګلونو قطع کول او د زیاتو لرګیو انتقال مطلق بند دي.
ددې غونډې په ترڅ کې، قومي مشرانو د شنو ونو او ځنګلونو د وهنې مخنیوی په برخه کې د ولسونو په استازیتوب  ډاډ ورکړل او ژمنه یې وکړه، چې د ځنګلونو وهنې مخنیوی په برخه کې به له دولت سره په بشپړه توګه همکاري کوي.