ننګرهار کې پر لسګونو بڼوالو د بڼوالۍ کڅوړې ووېشل شوی
١۲ لیندۍ ۱۴۰۲ه.ش
۲۰جُمَادَى الأول ۱۴۴۵ ه.ق
د ننګرهار د کرنې، اوبولګولو او مالدارۍ ریاست په هڅو د کرنې د ودې او کلیو پراختیا پروژي له لورې د ننګرهار په خوږیانو، سرخ رود، کوټ، چپرهار، اچین، رودات، مومندره، لعلپوره، دره نور او شېرزادو ولسوالېو کې پر ۱۷۹ بڼوالو د بڼوالۍ اړونده کڅوړې وېشل شوي دي.
د ننګرهار دکرنې، اوبولګولو او مالدارۍ رییس مولوي عبدالستار محمد وویل دکرنې د ودې او کلیو پراختیا پروژې له لورې ۱۷۹ بڼوالو ته په لسو ولسوالیو کې د بڼوالۍ بستي وویشل شوې.
د ننګرهار دکرنې رییس په خبره په هره کڅوړه کې د درمل شیندلو پمپ، قیچي، اره،۵۰ کیلوګرامه توره او ۵۰ کیلو ګرامه سپینه سره شامل دي.
سږکال د کرنې د ودې او کلیو پراختیا پروژي د ننګرهار په لسو ولسوالیو کې ۳۰۰ جریبه بڼوالې ترسره کړې ده، چې ۲۵۰ جریبه یې عادي او ۵۰ جریبه یې متراکم بڼونه دي .
د یادو کڅوړو د وېش موخه په ننګرهار کې د بڼوالۍ ترویج او په ټوله کې د بڼوالو لاسنیوي دي.
