لوګر کې د مېوه لرونکو ونو د درمل شيندلو «یوریا اسپرې» خزاني کمپاین پیل شو

۲ لیندۍ ۱۴۰۲ه‍.ش
۱۰جُمَادَى الأول ۱۴۴۵ ه‍.ق
د لوګر ولایت دکرنې، اوبولګولو او مالدارۍ ریاست وایي، چې ددې ولایت مرکز پُل علم سربېره دیاد ولایت د محمدآغې، خوښۍ، برکي برک او څرخ ولسوالیو کې د لوګر د کرنې اوبولګولو او مالدارۍ ریاست اړوند کرنیزو چوپړونو آمریت د بوټو ساتنې مدیریت مسلکي کارکوونکو له لوري د مېوه لرونکو ونو درمل شيندلو «یوریا اسپرې» خزاني کمپاین پیل شوی دی.
 د دې کمپاین د پیلولو موخه د نباتاتو د آفتونو او ناروغیو پر وړاندې مبارزه او د مېوه لرونکو ونو د آفاتو او ناروغیو مخنیوی دی
باید وویل شی د یاد پروګرام د تطبیق مالي لګښت د کرنې او مالدارۍ وزارت د بوټو ساتنې او قرنطین ریاست له لوري ورکول کېږي.
د لوګر ولایت د کرنیزو چوپړونو آمریت د بوټو ساتنې مدیر قاري عبدالجمیل وویل، چې د یوریا اسپرې جوړولو خورا اسانه ده هغه زیاته کړه: « یوه کیلو سپینه سره (یوریا) په 20 لیتره اوبو کې ښه حل کړئ او بیا کله چې هوا ښه صاف او روښانه وې د محلول پاش په واسطه یې پر ونو وشیندئ، ترڅو نباتات له آفتونو او ناروغیو څخه وژغورل شي او د ونو ژوند او حاصلات ډېر شي». 
دا په داسې حال کې ده، چې د کرنې، اوبولګولو او مالدارۍ وزارت د بوټو ساتنې او قرنطین ریاست له خوا د هېواد په ۳۴ ولایتونو کې د مېوه لرونکو ونو د آفتونو او ناروغیو د مخنیوي په موخه د درمل شیندلو «یوریا اسپرې» خزاني کمپاین پیل شوی دی.